Error message

Warning: reset() expects parameter 1 to be array, boolean given in eval() (line 7 of /var/www/html/aramram/modules/php/php.module(80) : eval()'d code).

ضرائب عقلانية

#مالنا

ضرائب عقلانية

طلعت اشاعات عن خطة حكومية لتوسعة الشرائح الخاضعة لضريبة الدخل من هون، والشارع الأردني ولع من هون

"حكومات جباية"... "ما تمسو جيب المواطن"... "حرامية".... "املاءات صندوق النقد"

شعارات ارتكاسية… ردة فعل، تلعب على المشاعر وما تزيد ولا تنقص

طب اقولكم، لازم نوسع الشرائح الخاضعة لضريبة الدخل

لازم عدد أكبر من الأردنيين يدفعوا هاي الضريبة

وخلونا نتناقش في الموضوع قبل ما تحللو دمي

3% فقط من الأردنيين يدفعوا ضريبة دخل.

فمنعيد: لازم تزيد هاي النسبة

بس هاي الزيادة لازم تيجي ضمن إعادة هيكلة للعبء الضريبي ككل.

ضريبة المبيعات، والرسوم، والضرائب الخاصة، وضريبة المحروقات، والجمرك….

فمع أنه 97% من الأردنيين معفيين من ضريبة الدخل.. كلهم يدفعون ضرائب

لما تعبي بنزين، من 22% ل40% من الفاتورة بتروح ضريبة

لما تدفع موبايل 44% من الفاتورة راحت ضريبة

لما تسافر، تشتري كهربائيات، تدفع حق خدمات، تقدم معاملة بدائرة حكومية، تاكل، تشرب، تشتري سيارة… كله بيندفع عليه ضريبة بشكل أو بآخر

وهون بصير التشوه بالنظام الضريبي.

لأنه قيمة الضريبة بتكون نفسها للغني وللفقير

يعني اللي بعبي بنزين 90 ب30 ليرة، بيدفع 7 منهم ضريبة، إن كان راتبه 600 أو 10,000 بالشهر.

تخيلوا عالم نزلت فيه قيمة ضريبة المبيعات لل10%، والتغت أو انخفضت قيمة الضرائب الخاصة، بس بنفس الوقت زادت الشرائح الخاضعة لضريبة الدخل، وبطريقة تصاعدية.

يعني اللي راتبه 10,000 دينار بيدفع 30% منه ضريبة، يعني 3,000دينار، واللي راتبه 600 بيدفع 5%, يعني 30 دينار.

بالمقابل، البضاعة التي كان حقها بالسوق 120 دنانير بتصير ب100.

هاي بتعوض عن هاي، واللي بسكر الفروقات اللي رواتبهم عالية.

بصير في إعادة توزيع للمصاري.

على القليلة، هيك النظرية.

ومطبقة بنجاح بكثير دول:

بالنرويج 45% من الايرادات الضريبية بتيجي من ضريبة الدخل، اللي ممكن توصل 55% من دخل للأثرياء.

بفرنسا للي راتبه فوق ال150ألف يورو سنوي بيدفع 45% منهم ضريبة دخل

حتى دول مثل أمريكا وبريطانيا، دول تعتبر الرأسمالية المثال الأعلى، ممكن توصل ضريبة الدخل 40-45% للي دخلهم مرتفع

والناس، بشكل عام، بتدفع وهي مبسوطة لأنهم بياخدوا خدمات كثيرة بدال الضرائب، من ضمنها تعليم، وحضانات، وصحة، ونقل.

نحن إذا بدنا نعمل قصة على إشي مفروض تكون على مستوى الخدمات المقدمة مش على مبدء الضرائب

النظام الضريبي من أهم أنظمة الدولة، بدونه ما في مصاري للدولة وما في خدمات حكومية

لازم يشتغل كوحدة متكاملة... ولازم يكون مستقر.

للأسف نظامنا الضريبي لا هيك ولا هيك.

عشوائي ومتقلب.

كل أكمن سنة يتغير، والتغيرات هدفا لمة سريعة لسد عجز بالموازنة

الخوف إنه القانون الجديد اللي عم بينعد يفوت بنفس القالب، ونضطر نرقعه كمان سنتين أو ثلاثة.

نحن بوضع اقتصادي مفرط، وبما أنه انفتح موضوع الضرائب وتعديل القانون، خلينا نخوض النقاش بجدية و بشمولية.

نبعد عن الفزعات، نكون عقلانيين.

كيف بدنا نوزع العبئ الضريبي؟ شو النظام اللي رح يحرك السوق ويحفذ الاستثمار؟ شو النظام اللي بخلي المواطن يدفع ضريبة وهو راضي؟ وكيف رح نبني هذا النظام بطريقة إنه يضل مستقر من هون ل10 سنين؟

إذا بدنا نطالب الحكومة بإشي، لازم نبلش هون.